Maabot sa 30 nga elementary students sa Catarman an nakatagamtam sin cash incentives tikang sa munisipyo tungod sa pagdaug nira sa national level competitions.Mga estudyante sira san Catarman I Central School, Cawayan Integrated School ngan Catarman SPED Center nga nakakuha sin medalya sa National Science Quest Competition 2020 nga ginbuhat sa bulan san Marso didto sa Baguio City. Mismo si Mayor Francisco Rosales Jr. an nagduhal san cash rewards sa champion students durante san simple nga Ceremonial awarding of Cash Incentives nga ginbuhat sa municipal covered court.An syendo nagdaug sin championship o first place sa national level competitions may insentibo nga tag-P10,000; second place -tagP7,000; nga P5,000 para sa 3rd place winner.Sayo ini nga programa san Catarman LGU nga paghatag sin pinansyal nga insentibo sa champion students pinaagi sa Special Education Funds (SEF).Sa kanya mensahe nagpahayag si Mayor Rosales san kanya pagka-proud sa mga estudyante tungod sa kamaukot nira sa pag-aradman rason nga nakakab-ot sira sin kadaugan sa mga kumpetisyon. Nagpatapod si mayor nga padayon an kanya hul-os nga suporta sa mga estudyante labi na kun nagpapakita sira sin paniguro nga maging maupay nga ehemplo sa sosyedad bilang kabataan.